“انا من بعد ما خذيت السارتيفيكا شديت في التجارة مع الوالد اللي كان يخدم في نفس الحانوط هذا مع جدي. بويا اسمو محمود و جدي اسمو محمود و الزوز كانو تجار في كل ماهو زرابي و مرقوم و البطانية . و بالرغم اللي جد الوالد الحج محمد كان فلاح في الزيتون الا انو اولادو حبو يجربو التجارة. الحانوط هذا حلوه اولاد خليف موش عجب من القرن 19 و الا اول القرن 20. و الحمد لله مازلنا مستحفظين عليه.
انا مولود من عام 33، و شديت مع الوالد عام49 وقتها عمري يمكن 16 سنة. و الحمد لله تو اولادي يخدمو معايا أنيس و محمود و مراد و امين و مهدي.
الخدمة تو اتطورت برشة. قبل حاجات بسيطة نبيعوهم كيف القدرون و الوزرة و القشابية و البرنوس و البطانية، تو ولينا زرابي ومرقوم تقليدي و متطور و مضخم. الناس متزالت تقبل عليها السلعة اللي يحبو التقليدي المضخم في ديارهم و حتى الشباب يجيو برشة و يشريو. اما اللي يخوف هو السلعة ماشية و تنقص خاطر اليد العاملة الصنايعية بدات توفى. ماعدش تلقى شكون يحب يتعلم النسيج متاع الزرابي و المرقوم كيف قبل. يقلك خدمة متعبة و ماعادش تخلص.
الحج أحمد بن محمود بن محمود بن محمد بن عبد السلام خليف – تاجر زربية و مرقوم بسوق الربع و البلاد العربي بصفاقس
